شانزدهمین نشست رهبران سازمان همکاری اقتصادی اکو بدون حضور نماینده افغانستان در شهر تاشکند اوزبیکستان روز «پنج‌شنبه ۱۸ عقرب» آغاز به کار نمود.
در این نشست رهبران کشورهای آذربایجان، اوزبیکستان، ایران، پاکستان، تاجیکستان، ترکمنستان، ترکیه، قرقیزستان و قزاقستان حضور دارند.
افغانستان که از سال ۱۹۹۲ عضویت این سازمان را کسب نموده بود برای دومین بار و بعد از سقوط جمهوریت در این نشست شرکت نکرده و جای خالی پرچم و نماینده افغانستان در این نشست مشهود بود.
سازمان همکاری اقتصادی اکو یک ساختار اقتصادی بین‌الدول منطقه‌ی می‌باشد که در آن کشورهای آذربایجان، افغانستان، اوزبیکستان، ایران، پاکستان، تاجیکستان، ترکمنستان، ترکیه، قرقیزستان و قزاقستان عضویت دارند.
شوکت میرضیایف رئیس جمهور اوزبیکستان ریاست این دوره‌ی اجلاس سازمان اکو را به عهده داشته و گفته است که شرکت‌کنندگان در باره همکاری‌های اقتصادی، توسعه همکاری‌های صنعتی، حمل و نقل و سرمایه‌گزاری با یک‌دیگر گفت‌وگو خواهند کرد.
شیرزاد اسدوف رئیس دفتر رسانه‌ی ریاست جمهوری اوزبیکستان گفته است که افغانستان یکی از اعضای این سازمان بوده ولی به دلیل تغییر سیاسی داخلی در آگوست ۲۰۲۱ این کشور مؤقتا به این اجلاس شرکت نمی‌کند.
آقای اسدوف تاکید کرده است که مشارکت گروه طالبان در فعالیت‌های سازمان همکاری اقتصادی اکو در صورتی امکان‌پذیر خواهد بود که بین کشورهای عضو این سازمان اجماع وجود داشته باشد و حکومت مؤقت این گروه از سوی جامعه جهانی مطابق با قوانین بین‌المللی به رسمیت شناخته شده باشد.
