دولت پاکستان از مهاجران افغانستانی فاقد مدارک اقامت قانونی معتبر در این کشور درخواست نموده است تا پاکستان را ترک نموده و به افغانستان بازگردند.
در اطلاعیه‌ی که وزارت داخله پاکستان منتشر نموده آمده است که؛ پاکستان اخراج مهاجران افغانستانی را پس از انقضای کارت اقامتی (POR) یا کارت گواهی ثبت‌نام آغاز نموده و از مهاجران افغانستانی فاقد مدارک اقامت قانونی درخواست نموده تا به افغانستان بازگردند.
در اطلاعیه وزارت داخله پاکستان آمده است که روند اخراج مهاجران افغانستانی فاقد مدارک اقامت قانونی معتبر از این کشور از اول آگوست برابر با دهم اسد آغاز گردیده است.
این در حالی است که پیش از این گزارشاتی مبنی بر عدم تمدید ویزای مهاجران افغانستانی در پاکستان منتشر شده بود و شهروندان افغانستانی بیان کرده بودند که پولیس پاکستان افرادی را که در انتظار تمدید ویزای خود می‌باشند را بازداشت و اخراج می‌نمایند.
دولت پاکستان روند اخراج مهاجران افغانستانی فاقد مدارک اقامت قانونی معتبر از این کشور را از سال گذشته آغاز نمود که با انتقادهای زیادی نیز روبه‌رو گردید.
نهادهای حقوق بشری بین‌المللی از جمله سازمان حقوق بشری عفو بین‌الملل می‌گوید عدم تمدید کارت‌های (POR) در پاکستان به معنای بلاتکلیفی نزدیک به یک و نیم میلیون مهاجر می‌باشد.
سازمان حقوق بشری عفو بین‌الملل از دولت پاکستان خواسته است تا روند اخراج مهاجران افغانستانی از این کشور را متوقف نموده و در خصوص تمدید کارت‌های اقامت مهاجران نیز اقدام فوری نماید.
