ریاست عمومی امنیت ملی اعلام کرد که نیروهای ویژه‌ی این ریاست طی عملیاتی یک شبکه پنج نفری گروه تروریستی حقانی و داعش را بازداشت کرده است.
ریاست عمومی امنیت ملی، امروز (یک‌شنبه، ۳ حوت) با نشر خبرنامه‌ی گفته است که این افراد به‌نام‌های جاوید، احمد مرید، روح الله، عبدالحفیظ و عبدالجبار که وظیفه‌ی نگهداری، انتقال، فعال‌سازی و راکت باران شهر کابل را داشتند، بازداشت شده‌اند.
ریاست عمومی امنیت ملی می‌گوید، که این افراد از ناحیه هفده‌هم شهر کابل بازداشت شده‌اند.
به گفته‌ی امنیت ملی مراسم یاد از شهید مزاری، میدان هوایی بگرام، میدان هوایی بین‌المللی حامد کرزی از اهداف تروریستی این شبکه بوده است.
هم‌چنان ریاست عمومی امنیت ملی به شهروندان کشور اطمینان می‌دهد که هسته‌های شهری گروه‌های تروریستی را شناسایی کرده و به زودترین فرصت آن‌ها را دست‌گیر می‌کنند.
